Государственный национальный театр Удмуртcкой Республики

  Карелиысь йӧскалык театр Удмуртиын гастрольёссэ «Лемби» калык драмаен кутскоз  

Туннэ, 27-тӥ куарусёнэ, Удмурт йӧскалык театр Карелиысь йӧскалык театрлэсь труппазэ пумитаз. Петрозаводскысь артистъёс Удмуртие «Бадӟым гастрольёс» федерал программа улсын вуизы но ваньзэ 3 спектакль возьматозы. Вошъяськон гастрольёсты карел театр финн кылын мынӥсь «Лемби» калык драмаен (12+) кутскоз.

Кызьы шуиз журналистъёслы Карелиысь йӧскалык театрлэн чеберлыко кивалтӥсез но «Лемби» спектакльлэн режиссёрез Сергей Пронин, та драма театрын ог 10 ар мынэ ни. Удмуртиысь учкисьёс ужлэсь кыкетӥ тупатъямзэ адӟозы. Режиссёр верамъя, «Лемби» спектакльын сямъёс, историзм но осконлык тужгес яркыт огазеясько.

Та спектакль калык драма шуэмын ке но, зэмзэ верано ке, со сыӵе спектакль-ритуал. Отын вань трос ритуал моментъёс, кудъёсыз ӵапак Карелиен герӟаськемын. <…> XVIII-XIX дауръёсы, тужгес XIX даурлэн шораз Карелиын раскольникъёсты, староверъёсты уйылыны кутскизы. Соин валче язычествоен нюръяськон мынӥз. <…> Та пыр Россиысь мукет улосвылъёс но ортчизы, соос пӧлын поръёс но удмуртъёс, но тужгес зол со Карелиын вал. Та югдурын романтической яратон история возьматэмын
Сергей Пронин, Карелиысь йӧскалык театрлэн чеберлыко кивалтӥсез

Сергей Пронинлэн кылъёсызъя, драма вашкала дырысь учыръёсты возьматэ ке но, режиссёрлэн потӥз спектакль туала кылын верамын мед луоз шуыса. Учкись та историе мед «зымоз» шуыса, спектакльлэн декорациосыз но крезьгуро оформлениез вашкала сямъёслэсь палэнскыса лэсьтэмын, пусъе театрлэн чеберлыко кивалтӥсез.

«Лемби» драмаын шудӥсь актёр Андрей Горшков верамъя, та спектаклез одно ик учконо, малы ке шуоно татын историлэн тодмотэм бамъёсыз усьтӥсько.

Со усьтэ историлэсь тодмотэм бамъёссэ, кылсярысь, Карелиын марӟан потто вал шуыса ӧжыт, кин тодэ, но со вал. Со вань милям спекталямы но, соин валче трос мукет историческоез. Со сяна, отын туж валантэм учыр
Андрей Горшков, Карелиысь йӧскалык театрысь актёр

Ватсалом, Петрозаводскысь театр Удмуртие куинь нуналлы вуиз. 28-тӥ куарусёнэ артистъёс ӟуч кылын «Венецианские близнецы» комедиез (12+) возьматозы, 29-тӥ куарусёнэ – нылпиослы «Корона тролля» выжыкылэз (6+).

Тодэ вайытом, «Бадӟым гастрольёс» федерал программалэн «Вошъяськон гастрольёс» ӵектосэз улсын Удмурт йӧскалык театр 2 ар ӵоже ньыл улосвылъёсысь йӧскалык театръёсын ужаз. 2017-тӥ арын Удмуртиысь театрлэн Марий Элысь но Коми-Пермяк округысь театръёсын вошъяськон гастрольёссы ортчизы. Таяз арын тулась Удмурт йӧскалык театрысь артистъёс Сыктывкаре ветлӥзы но Коми Элькунысь крезьгуръя но драмая йӧскалык театрез пумитазы. Инвожое асьме театр туала репертуарысьтыз тужгес яркыт ужъёсыныз Карелиысь учкисьёсты тодматӥз.

Наталья Тетерина
27.09.2018
ИА «Удмуртия»