«Намер» пьеса притча шуыса нимамын. Тупа-а со жанрлэн куронъёсызлы?
Притчаын возьматӥське улонын ӵем пумиськылӥсь учыр, герой кыӵе ке но нравственной законэз яке тӥя, яке соя кариське. Притчаын ӧвӧл вошъяськись характеръёс, котькудӥз герой пыртэмын трос адямиослэсь улон шоры огкадь учкемзэс возьматон понна.
Тани гордармеец Лякоп, фанатик сямен, Ленинлы мур оскыса, штыкен но пыӵалэн узыръёслы пумит нюръяське. 2019-тӥ арын Лякоп — анахронизм. Оло, пьесалэн авторез пародировать карыны медэ вал кылем даурысь 20-тӥ-30-тӥ аръёсысь писательёсын кылдытэм образъёсты — социальной классъёстэк улон понна нюръяськись геройёсты? Лякоплэн образысьтыз комедилы тупасьсэ шедьтыны луэ. Красноармеец уг вала, уг кылы котырысь адямиосты, уг шӧды та выль улонысь аслэсьтыз интызэ. Соин выросъёсыз но вераськемез учкисьлы тумошо пото. Лякоп — идеология понна гинэ улӥсь, аслаз шонер луэмезлы мур оскись, мукет сямен малпаськыны быгатӥсьтэм адями. Солэн дунне шоры палдурес учконэз зэмлыко ӧвӧл. Соин Лякоп пьеса пумын чиптэм-чаптэм ыше, бус кадь сылме, туж чебер — фантастика — амалэн. Учкисьлэн но авторлэн сюлмазы Лякоп уг лякиськы.
Пьесалэн авторез фантастика но мистика амалэз кутэ даур ӵоже вошъяськись улон шоры пӧртэм синмын учкон понна. Даурлэн символэз — 125 аресъем Анна, со ваньзэ чидамын-адӟемын. Автор Аннаез мукет сямен нокызьы но возьматыны уг тыршы ни. Анналэн дунне вылын таӵе кема улэмез валэктӥське яратоно картсэ, Лякопез, возьмаменыз. Анна сое адӟемез бере шыпак гинэ кулэ. Пьесаын солэн декоративной функциез таин быриз. Та пересьлэн образэз пьесае мелодрамалэсь тодметъёссэ пыртэ. Учкисьлэн сюлмыз позырске, синкылиез потэ.
Анна кулэм бере инме ӝутӥське ӝуась туп. Анналэн нунокез, Яша, сое валэктэ, Лякоплэн лулыз музъем вылысь ӝутӥське шуыса. Малы ке шуоно Анна, трос аръёс Лякопез витьыса, ӧтьыса, картэзлэсь лулзэ, кошкыны лэзьытэк, возем. Таиз но мелодрамалэн тодметэз, шуыны луэ.
Анналэн семьяез пыр автор возьматэ адямиослэсь даур ӵоже вошъяськись дунне шоры учконзэс.
Кылсярысь, Яша — арлыдо крестьянин, Лякоплэн нунокез. Со Лякоплэсь кузьымзэ — трофей сапегзэ — уг куты. Угось Лякоп данъяськыса вера, тќдьы офицерез ас киыныз быдтћз но солэсь сапегзэ басьтћз шуыса. Пусъёно, притча яратэ символъёсты.Со Лякоплы чутрак пумит луись персонаж: совето вакытэз уг ушъя, Горд Армиез уг яраты. Яшалэсь рользэ постановкаын шудэ артист Пётр Романов. Сое шудэмзэ учкыса, таӵе валан кылдэ: Яша куштӥське Лякоплэсь, соин валче — совето вакытэ улонлэсь но. «Луимы-а шудо?» — шуэ Яша, пьесалэн пумаз. Таӵе риторической юан пуктыса, Яша валэктэ кадь: шудо ӧм луэ.
Пьесаын куинетӥ тип но возьматэмын: Яшалэн 40 аресъем Миша пиез, солэн улэмез но дунне шоры учкемез. Диалогъёс пыр учкись азе пуксе туала муртлэн образэз: городын охранник луыса ужа, огъяулонниын куинетӥ кышноен улэ, нылпи солы кулэ ӧвӧл. Малы ке шуоно нылпи вордӥськиз ке, бадӟымгес улон инты понна сюлмаськоно, кредитэн квартира басьтоно луоз. Нош Миша малпаське люкам уксёеныз Турциын шутэтскыны. Мишалэн образэз вера: общество выльысь социальной классъёслы люкиськиз. Выльысь тӧдьыос (узыръёс) но гордъёс (куанеръёс) кылдӥзы.
«Намер» пьеса калыклэсь туала улонзэ возьматонлы сӥземын. Но татын сюжетэз ӧвӧл, диалогъёс пыр яркыт возьматэмын туала типъёс, сётэмын соослы дунъет. Со жанрезъя укша драма-диспутлы. Но нокыӵе но меӵак валэктонъёс, авторлэн аслаз малпанэз яркыт уг адӟисько. Сыӵе тӥни притча — ваньмыз вошъяське, адямилэн шӧдонъёсыз, яратонэз гинэ кылё дауръёслы.

Лариса Дмитриева
Удмурт Дунне Май 24, 2013