Удмурт театр алигес вуылӥз Петрозаводске — Карелиысь йӧскалык театрын спектакльёссэ возьматӥз. Артистъёслы фин-угор эшъёссы доры вуылыны кылдӥз «Бадӟым гастрольёс-2018» федерал программалы луыса.
Та гастрольёс Удмурт театр понна нырысетӥосыз ӧвӧл ни — вазенгес соос вуылӥзы Марий Элэ, Комие, Коми-Пермяк автономной округе, озьы ик отысь театръёс удмурт учкись доры вуылӥзы.
— Малы ми фин-угор театръёстӥ гастрольёсын ветлӥськомы? Нырысь ик, милемлы тунсыко, кызьы ужало, мар лэсьто милемлы матын театръёс. Нош мар меда ми быгатӥськомы соослы возьматыны? — вера Удмурт театрысь валтӥсь режиссёр Алексей Ложкин. — Тазьы потаса, синъёсмы усьтӥсько: ми интыямы ум сылӥське. Тае валамы, Карелие вуылыса но. Куке отын возьматӥмы «Алые паруса» спектакльмес, учкисьёс артистъёсты сцена вылысь ӝыны час пала кошкыны ӧз лэзе.
«Алые паруса» мюзиклзэ сяна, Удмурт театр отын возьматӥз на «Эрико яратон» комедизэ но «Конёк-Горбунок» выжыкылзэ. Ӵапак та спектакльёсты возьматыны курем Петрозаводскысь театр. Али гужем ке но — бакча ужъёс, шутэтскон нуналъёс — залын одӥг пукон но буш кыльымтэ. Нош вань спектакльёсты возьматэмзы бере удмурт артистъёс матысьгес тодматскизы Карелиен, вуылӥзы музейёсы, тыосты, водопадъёсты адӟизы, марциальной вуосын эмъяськизы, ӝутӥзы ужпумъёсты но…
Карелиысь Национальной театрлэн сцена вылаз Удмуртиысь артистъёс
— Котькуд театре ветлэммы бере ми одно ик кенешиськомы отысь артистъёсын, адӟиськомы, кызьы уло театръёс, — шуэ Алексей Ложкин. — Жаляса верано, карел кылын драматургия туж ляб азинске, театразы, шуыны луоз, анай кылын спектакльёс одӥг-кык гинэ пукто.
Та ужпум али тросаз фин-угор театръёсын пумиське, со шӧдӥське Удмуртаз но: сцена вылын туж ӧжыт удмурт гожъяськисьёслэн ужъёссы, нош нылпиослы удмурт кылын спектакльёс воксё но ӧвӧл. Со вакытэ ик Комиын 85-90 процентэз спектакльёссы пуктэмын асьсэ драматургъёссылэн пьесаоссыя.
Нош удмурт учкисьёс табере возьмалозы Карелиысь артистъёсты. 27-тӥ-29-тӥ куарусёнэ Удмурт театрын соос возьматозы С. Кантерволэсь фин кылын «Лемби» калык драмазэ (12+), К. Гольдонилэсь «Венецианские близнецы» комедизэ (12+) но О. Портретовалэсь «Корона Тролля» выжыкылзэ (6+). Билетъёс вузасько ни.
Мария Векшина
Июль 9, 2018
газ.Удмурт дунне
