«Намер»… Удмурт театрлы тупась мӧзмыталэс пьеса ним. Мар ватскемын та ним сьӧры? Шуак мур но выль омырен шокчытӥсь спектакль. Нош со уз-а чырсаты комедиослы дышем учкисез?
Удмурт театр — со огкадьманерен ужась артистъёс, консервативной, тып-тып коллектив. Таизлы ми дышим ни кадь, авангард ум куриське. Ум ни куриське актёръёсты пӧртэм сямен шудыны, шонтӥм амплуаоссы шоры. Валамон, премьерае мынӥськом Удмурт театрлэн дышем тусызлы шумпотыны.
«Намер» аслэсьтыз учкисьсэ шумпоттоз. Тодады вайытом, та пьеса кылем арын удмурт драматургилы сӥзем ӵошатсконын нырысетӥ инты басьтӥз. Павел Зоринлэн «Художник и Надежда» пьесаеныз ӵошатоно ке, сояз но, таяз но огкадь проблема пумиське: пичи гуртэз быдтон. Марлы театрлэн репертуараз одӥг кадь пьесаос сюремын? Маиныз Анатолий Григорьевлэн ужез Павел Зоринлэн произведениезлэсь кужмогес?
Валэктон сётӥз театрен кивалтӥсь Андрей Ураськин:
— «Намер» мукет пьесаослэсь висъяське. Сое огшоры гинэ валаны уг луы. Жанрзэ притча шуим ке но, притча гинэ ӧвӧл со. Вакытъёс пыр уян, вужзэ но выльзэ огазеян — таӵеез ӧй вал на. Эксперимент порма луиз, нырысетӥ учкисьёсмы шуо: спектакль валамон но, тунсыко но. Берло дыре тросгес серьёзной спектакльёс пуктӥськом. Учкисез дышетыны кулэ, музыкальной комедиосын гинэ «сюдоно» ӧвӧл. Мон малпасько, та пьесаын возьматэмын тросэз туннэ нуналысь шуг-секытъёс. «Художник и
Надежда» драмаен ӵошатыса, «Намерын» пӧртэм ужпумъёс сэрттӥсько-пертчисько.
Кыӵе ужпумъёс меда? Город но гурт вискын «ӵошатскон», егитъёс но пересьёс, ас выжыдэ утён… Зэмзэ вераса, Намер — со чылкак удмурт луллэн шӧмыз: чырс — но ческыт, нюлэсъёсы ватскем емыш. Пьесаын возьматэмын удмурт адямилэн улон сюресэз, асьме историмы, вакытмы. Дырысь дыре выжон приём сокем выль ӧвӧл ке но (адӟим ни сое, кылсярысь, «Дорвыжы» спектакльын), ӵапак «Намерын» со сюлэмез бугыртэ. Герман ож, Граждан ож, сютэм аръёс, Быдӟым Отечественной, Чечня… Вӧсь яраосын соос бурмизы удмурт сюлэмъёсы — татын калыкмы быриз. Берпуметӥез гинэ но, перестройка шуон, улон радэз куашкатӥз. Таиз адӟиське кияз сур чеплашкаен Мишалэн образаз. Анай-атайёсыз Яша но Натӥ удмурт юртсэс утьыны выро на ке, Миша — зэмос мылес, городын общежитиын улӥсь воргорон, туала кылын шуысалзы — лузер. Трос соос, суро-пожо, ӟучо-удмурто, асваланзэс ыштэм муртъёс, каре пегӟисьёс… Авторлэн сюлэмыз висе сыӵе шузи но валантэм югдурлы: гуртын корка куашка, нош утьыны сое нокинлы.
Инмысь усем геройлы ке шат? Ӵын пушкысь сцена вылэ кылдӥз азьвыл аръёсысь куно — Лякоп. Шораз учкыса, амалтэк мынялод: В. Краснопёровлэн героез сокем наивной, сокем революциез данъясь — ачиз ик В. Краснопёров верам кылъёсызлы оске, лэся. В. Краснопёров котьку но лӧптылӥсь, выжыкылъёсысь кадь егит пиосты шудэ — амалтэк пальпотоно… Мишаез шудӥсь И. Моисеев ке — выль образын, котькуд спектакльын пӧртэм, рольёссэ эскерыны тунсыко. В. Моисеева вӧзаз — огдышем мунё: востэм удмурт ныл.
Актёръёс дышем сямен шудо ке но, таяз спектакльын, соос шоры учкыса, пушкад мар ке позырске. Бен, трос бӧрдо, куректо но ӝожтӥсько. Зэм, таиз акыльтӥз. Оло, ӧз? Малы П. Романовлэн Яша героез, вал сиесэн (улон выль — нош вал сиес вуж, удмурт калык нош — кыткиськем кобла, вера кадь режиссёр В. Сафонов) сцена дуре потыса, учкисьлы юан сётэ ке, учкись соку ик пумитаз куаразэ поттэ? «Соос быризы асьмеос шудо луон понна. Но асьмеос шудо луим-а?» — «Ӧм»…
Та спектакль бере ӟечгес луим-а? Луим. Синкылияським-а? Синкылияським. В. Садаевалэсь Аннаез шудэмзэ адӟыса, ачим лушкем бӧрдӥ: 86 аресъем ӵужанайме малпай…
Дарали Лели
газ.«Удмурт Дунне» 24 май 2013г.
