Государственный национальный театр Удмуртcкой Республики

  Ньыль выль спектакль вуоно сезонлы дасяло Удмуртиысь йӧскалык театрын  

Выль сезонын Удмуртиысь йӧскалык театрын ньыль выль спектакль возьматозы. Со сярысь ивортӥз театрысь литературая ёзэтлэн кивалтӥсез Наталия Панфилова.
Режиссёрлэн Владимир Сафоновлэн кивалтэмез улсын «Мёртвые души» спектакль дасяло. Санкт-Петербургысь суредасьлэн Игорь Шаймардановлэн эскизъёсызъя но макетэзъя лэсьтэм костюмъёс но декорациос дась ним шуыны луоз, чыры-пырыужъёс гинэ кылизы на. Премьера 20-тӥ куарусёнлы чакламын.
Гужем шутэтскон бере театрлэн валтӥсь режиссёрез Алексей Ложкин «Васьлей» спектакль борды басьтӥськоз. Пьесаез гожтӥз егит драматург, Удмуртиысь мунё театрысь актёр Сергей Антонов. 2017-тӥ арын со йӧскалык театрын «Пуны» пьесаезъя нырысетӥ спектакльзэ пуктӥз. Пичи залын мынӥсь драмаез учкисьёс туж умой пумитазы. Выль ужзэ валтӥсь сцена вылын возьматозы, синхрон амалэн ӟуч кылэ берыктон но чакламын луоз.
Выль арлы театрын «Весёлый Роджер» нылпи спектакль дасялозы. Пьесаез Глазкарысь «Парафраз» театрысь режиссёр Дамир Салимзянов гожтӥз.
Тол каникулъёс бере Александр Островскийлэн «Бедность не порок» пьесаез бордын ужаны кутскозы. Спектаклез пуктыны Москваысь егит режиссёрез Андрей Цисарукез ӧтизы.
Тодэ вайытом, куарусёнэ Удмуртиысь театрлэн сцена вылаз аслэсьтыз спектакльёссэ возьматоз Карелиысь йӧскалык театр. Нош инвожо пумын асьме артистъёс тужгес яркыт ужъёсынызы Петрозаводскысь учкисьёсты тодматозы.

Майя Бывальцева
21.06.2018
ИА«УДМУРТИЯ»