Государственный национальный театр Удмуртcкой Республики

  Малы огпол гинэ возьматӥды?!  

Фин-угор театръёс ог-огзы дорын куноясько

Удмурт театр Россиысь мукет театръёсын валче пыриське «Бадӟым гастрольёс-2018» федерал программае. Артистъёсмы вуылӥзы ни Йошкар-Олае, Кудымкаре, алигес бертӥзы Сыктывкарысь, та толэзь пумын сюрес нуоз Карелие.

Таӵе гастрольёсты Удмурт театр кемалась ӧз адӟылы вал ни. Берлозэ артистъёс потазы 2013-тӥ арын, «Культура России» федерал программае пыриськыса, котыртӥзы Башкириысь, Татарстанысь, Марий Элысь, Пермь, Киров улосвылъёсысь удмурт гуртъёсты. Нош «Бадӟым гастрольёс-2018» федерал программа паськытгес сюрес усьтйз: удмурт артистъёс потало фин-угор ӵыжы-выжыоссы доры, творчествозэс возьматэм сяна, асьсэос но выльзэ пыӵато.

- Ми куное 2-3 спектакльёсын мынйськом, мукет театръёс но дорамы озьы ик вуо, тазьы валаны луэ, маин шока-улэ театр, - вера Удмурт театрысь валтйсь режиссёр Алексей Ложкин. - Валамон, куд-огъёсыныз, кылсярысь, поръёсын, шугъяськонъёсмы огкадесь: со режиссура но драматургия. Режиссёръёсты палэнысь вайыны луэ на ке, удмурт учкисьлы валамон пьеса ӟуч драматург уз гожты, кулэ удмурт кадръёс. Тазьы ветлэмысьтымы ик малпанэ кылдӥз: радъяно Россиысь егит режиссёръёс пӧлын лаборатория. Нырысь соос асьсэ ужъёсынызы видео лэсьтыса ыстозы, ми пӧлысьтызы 10-сэ устооссэ быръём но Удмурт театре ӧтём. Татын соос артистъёсын пичи миниатюраос лэсьтозы, вормись собере быдэс спектакль пуктоз ни удмурт кылын.

- Артистъёс гастрольёсы ӝутскем мылкыдын ветло: выль инты, выль учкисьёс, выль сямен шудон, - вера Удмурт театрысь литературно-драматической ёзэн кивалтӥсь Наталия Панфилова. - Учкисьёс но туж умой пумитало: куддыръя спектакль бере артистъёсын вераськыны кылё. Тросаз спектакльёсамы билетъёс толэзьлы азьлапал быро. Кылсярысь, коми-пермякъёс доры «Алые паруса» мюзиклэз нуим, малы одӥг нунал гинэ, пе возьматӥды, Сыктывкарын «Капитанская дочка» спектаклез 2 пол пуктыны куризы.

Гастрольёслы шумпото артистъёс но.
- Дуннеез коть котыръяськом, ас гуамы гинэ ум пукиське, - вера Удмуртиысь дано артистка Елена Сунцова. - Адӟиськом, кин кызьы улэ. Удмурт шаерын анай кылын драматургия улэ на, гожъяськисьёсмы вань, нош коми-пермякъёс тросгес ӟуч авторъёслэсь пьесаоссэс пуктыло ни. Кыӵе чебер театрзы Кудымкарын! Но коми-пермякъёс автономизэс ыштэмзы бере сыӵе куанермемын. Шуом, спектакль репертуарысь потэ ке, милям сомында костюмъёсмы юнме кыллё, нош отын 1-2 дӥсь сяна уг вуро, таоссэ но бӧрысь уг кушто, выль дӥсь вурыны тыршо. Со вакытэ ик ми берло 2 арзэ гуртъёсы ум потаське ни, учкись ачиз Удмурт театре лыктэ, нош Сыктывкарын но Кудымкарын гастрольёсын ветло на.

Вераны кулэ, таӵе гастрольёс режиссёръёслы но артистъёслы гинэ пайда уг ваё, выль омырез шокчо учкисьёс но. Кылсярысь, комиос доры удмурт учкись тымиськыса лыктӥз. Уго огез пьесазы - А.Поповлэн «Кышнояськы, пие, кышнояськы» комедиез - удмуртлы туж валамон но матын. Кызьы шуэ А. Ложкин, комиослэн А. Поповзы - со асьме А. Григорьев кадь, гурт комедилэн «мамонтэз». Удмурт учкисьлы секытэнгес сётскиз коми-пермякъёсын пуктэм Н. Колядалэн «Кошкы-кошкы» трагикомедиез. Уго та туала ӟуч драматурглэн кылыз туж лэчыт но бышкись.

Нош азьланяз удмурт учкисез эшшо но тунсыкогес спектакльёс возьмало на. Сӥзьыл дорамы вуозы Карелиысь артистъёс. 27-тӥ-29-тӥ куарусёнэ соос возьматозы С.Кантерволэсь фин кылын «Лемби» калык драмазэ (12+), К.Гольдонилэсь «Венецианские близнецы» комедизэ (12+) но О.Портретовалэсь «Корона Тролля» выжыкылзэ (6+). Нош Удмурт театр Карелие, Петрозаводске, мынэ ни инвожо пумын. Отын со возьматоз «Алые паруса» мюзиклзэ (16+), «Эрико яратон» комедизэ (16+) но «Конёк-Горбунок» выжыкылзэ (6+).

Мария Векшина
газ.»Удмурт дунне» («Удмуртский мир»)
2018-тӥ ар 7-тӥ инвожо