Государственный национальный театр Удмуртcкой Республики

  Коми театр вуоз Удмуртие  

Удмурт театр туэ но пыриське «Бадӟым гастрольёс» федерал программае. Оштолоэзе дорамы спектакльёссэ ваёз Коми театр, куартолэзе коми учкисьёс доры мыноз Удмурт театр.

Коми театр нырысетӥ спектакльзэ пуктоз 13-тӥ оштолэзе, кутскоз 18.30 часын. Удмурт учкись адӟоз Алексей Поповлэн пьесаезъя пуктэм «Кышнояськы, пие, кышнояськы» крезьгуро комедиез (12+). Коля егит пи кышноясько, пе, табере солы вакчи дыр куспын выль кен шедьтоно. Спектакль мыноз коми кылын, наушникъёс пыр чузъяськоз ӟуч кылэ берыктэм текст. 14-тӥ оштолэзе комиос 2 спектакль возьматозы: 11.00 часын нылпиослы чаклам «Ксюша да инопланетянин» (0+) выжыкыл, нош 17.00 часын — «Жизнь с привилегиями «навечно» драма (12+). Со лэсьтэмын Николай Волоховлэн автобиографической пьесаезъя. Кноблих семья вордӥськем палъёсысьтыз кыдёкысь шаеръёсы ыстэмын. Кызьы соослы улӥське выль интыын?

Удмурт театр Комие мыноз куартолэзе. 18-тӥ куартолэзе отын возьматоз «Царевна-Лягушка» выжыкыл (0+) но «Эрико яратон» комедия (12+). Мукет нуналаз — «Капитанская дочка» драма (12+).

«Бадӟым гастрольёс» федерал программае Удмурт театр пыриське ни 2-тӥ арзэ. Кылем арын со вуылӥз Кудымкаре но Йошкар-Олае. Таӵе луонлык понна тау шуыны кулэ Россиысь Культурая министерстволы но Гастрольёсты азинтонъя федерал центрлы. Гастрольёслы луыса учкисьёс тодматско Россиысь пӧртэм театръёсын.

Наталия Панфилова
газ."Удмурт дунне"
Апрель 5, 2018