Государственный национальный театр Удмуртcкой Республики

  Вошъяськон гастрольёс улсын оштолэзе Ижкаре Коми театр лыктоз  

«Бадӟым гастрольёс-2018» федерал программа улсын оштолэзе-куартолэзе Удмурт йӧскалык театрлэн но Коми Элькунысь Крезьгуръя но драмая йӧскалык театрлэн вошъяськон гастрольёсы ортчозы. Таяз толэзе куноос Удмуртиысь учкисьёслы комедия, драма но выжыкыл возьматозы. Со сярысь ивортӥз Удмурт театрлэн литературая ёзэтэзлэн кивалтӥсез Наталия Панфилова.

13-тӥ оштолэзе Алексей Поповлэн пьесаезъя «Гöтрась, пиö, гöтрась» («Кышнояськы, пие, кышнояськы») крезьгуро комедиез возьматозы. Николай пӧсекъяса кышнояськыны кыл сётӥз, табере кӧня ке нунал куспын кузпал шедьтыны кулэ. Та секыт ужын солы юрттыны басьтӥське Василий эшез… Спектакль коми кылын мыноз, синхрон амалэн ӟуч кылэ берыктыса. 12+

14-тӥ оштолэзе нылпиослы фантастика люкетъёсын «Ксюша да инопланетянин» выжыкыл возьматозы. Спектакль ӟуч кылын мыноз. 0+

Со нуналэ ик ӝытазе Николай Волоховлэн автобиографической пьесаезъя «Жизнь с привилегиями «навечно» драмаен тодматскыны луоз. Отын улонлэн бадӟым люкетэз возьматэмын — Быдӟым Атыкай ож кутсконысен асьме дырозь. Учкисьёс туж зэмлыко адӟыны быгатозы, кызьы улӥзы, кыӵе шугъяськонъёсын пумиськылӥзы кыдёкысь шаеръёсы кужмысь келям муртъёс. Спектакль ӟуч кылын мыноз. 12+ Удмуртиысь театр Коми Элькунэ куартолэзь шорын мыноз. Сыктывкарын улӥсьёс «Царевна-Лягушка» выжыкылэз, «Эрико яратон» комедиез но «Капитанская дочка» драмаез учкыны быгатозы.

Тодэ вайытом, «Бадӟым гастрольёс» программае Удмуртиысь театр кыкетӥзэ пыриське ни. Кылем арын Коми-Пермяк театрен но Марий Элысь йӧскалык театрен вошъяськон гастрольёс ортчизы.

Майя Бывальцева
ИА"Удмуртия"
4 оштолэзь 2018