Туннэ, 27-тӥ южтолэзе, — Театръёслэн нуналзы. Тае пусйыса, театръёс асьсэ учкисьёссы пӧлын шудон ортчыто.

Шаерысьтымы 4 театръёс — Удмурт, Ӟуч, озьы ик Мунё но «Молодой человек» — люказы асьсэ учкисьёссэс. 18.00 часысн соос театрысь театре ветлозы но быдэсъялозы артистъёсын дасям ужъёсты, юанъёслы валэктон сётъялозы. Котькуд станциын озьы ик селфи лэсьтылозы, вотэсын лайкъёс бичалозы.

— Та шудонэз радъяз Теат удысын ужасьёслэн огазеяськонзы, учкисьёс артистлэсь улонзэ мед кӧня ке шӧмъялозы шуыса, — шуэ Удмурт театрысь артистка Елена Сунцова. — Шудон ортчем бере вань пыриськисьёслы пичияк кузьымъёс сётъялозы — театре билетъёс.

Вераны кулэ, Удмурт театр команда люка шуыса ялӥз но, туж трос калык вазиськиз. Соин ик нимысьтыз кылдӥз висисьёслэн (болельщикъёслэн) но командазы. Шудон калыклы кельшиз ке, со вуоно аръёсы но радъяськоз на, шуо театралъёс. 16+

Мария Векшина
газ."Удмурт дунне"
Март 27, 2018