Государственный национальный театр Удмуртcкой Республики

  Малы дышетэ «Намер»?  

15-тӥ куартолэзе Удмурт театр возьматӥз А. Григорьевлэсь «Намер» притчазэ. Притча — со малы ке но дышетӥсь произведение. Малы меда дышетэ «Намер»?
Действие ортче 2019-тӥ арын Намер нимо куштэм гуртын. Отчы, 100 ар ортчыса, вуэ Граждан оже кошкем Лякоп пияш (шудэ В. Краснопёров) но пумита аслэсьтыз ӵыжы-выжыоссэ. Улонын ортчем воштӥськонъёс Лякоплэн гинэ ӧвӧл, учкисьлэн но син азяз пуксё.
А. Григорьев пьесаяз туж трос лэчыт ужпумъёсты ӝутэ. Татын возьматэмын войналэн шимес луэмез, атайёс но пиос куспын тупамтэос, гуртъёслэн быремзы, туала общество азьын сылӥсь шуг-секытъёс, семья кусыпъёс, выжы бырон, нылпи куштон…
Сюжет ӧръяськемъя та ужпумъёс ялан ог-огзэс вошто. Трос юанъёс сётыса, автор учкисез но малпаськыны косэ. Но малпанъёс нырысь одӥг пала шонско, одӥг ужпумъя огъя малпан кылдыны уг вутты — автор мукет пала кыске ни учкисез. Вань та ужпумъёсты усьтон понна быдэс роман-эпопея кулэ луысал, дыр, нош притчаын (притча жанр пичи луыны кулэ) соос сурасько. Озьы ке но автор быдэстэ ик ужпумзэ: котькуд учкисьлэн йыраз каръяськытэ кыӵе ке лэчыт юан.
«Намерын» фантастика амал кутэмын: гордармеец Лякоп, 100 ар ортчыса, егитэн ик дораз бертэ. Солэсь образзэ эскерыса, трос ваче пумит малпанъёс кылдо. Со копак мултэс муртэн адске туала улонын, аслаз энтузиазменыз, революция сярысь малпанъёсыныз. Со дыре ик акыльтоно учкыны, кызьы ог куинь сценаын огвыллемгес действие ортче: Лякоп но туала адямиос долкаса ог-огзы шоры учко но туж кема валаны выро, ма луиз. Нырысь со серемес, собере ини акылес. Пумозяз ӧвӧл вуттэмын Лякоплэн кузпалызлэн — пересь Анналэн (шудэ В. Садаева) кусыпъёссы. Быдэс спектакль ӵоже Лякоп большевикъёс сярысь вераськыса ветлэ, нош Аннаен кусыпъёссы палэнэ кылё, но ӵапак Анналэн даур ӵоже картсэ возьмамез понна ук берытскемын Лякоп. Ярам коть, пумаз ини соос верасько ог-огенызы, Анналэн лулыз кошке яратоно картэз доры.
Фантастика жанрен произведениосты мон туж яратӥсько, малпалляме но вань, мед потысалзы ни удмурт кылын фантастика амалэн гожтэм произведениос. Но «Намерез» учкыса, мон синмаськи сыӵе сценаослы, кытын усьтӥське огшоры улон-вылон. Туж кельшымон возьматэмын Яша (шудэ П. Романов) Натӥ (шудэ Г. Владыкина) кузпалэныз — соос удмурт сямъёсты возисьёс луо.
Сыӵе йыг-йыг адямиос вӧзын Лякоплэн вераськемез юнме омырез зуркатэм кадь кылӥське. Маргинальной Миша (шудэ И. Моисеев), Яшалэн но Натӥлэн пизы, шоры учкыса, нырысь потэ, со учкисез серекъятыны гинэ пыртэмын шуыса. Но со озьы ӧвӧл: Миша пыр возьматэмын тросэзлэн туала егитъёслэн шутэтскон, капчи улон сьӧры уйиськемзы.
Автор улонлэсь трос шекъёссэ, тырмымтэоссэ шарая. Спектаклез учкыса, валаськод: адямилы трос ужано на дуннеез чылкытгес, чебергес карон понна. Нош кызьы — тодмо ӧвӧл, таизлы валэктон асьмелы утчано. Автор сётэ ик учкисьлы одӥг валэктон: вордскем музъем вылад кылён, городысь гуртад берытскон вань шуг-секытъёсты сылмыто. Улонын сыӵе капчиен ваньзэ вормыны луысал ке!
Намер — чырс емыш, кинлы ке кельше, кинлы ке — уг… Но солэсь шӧмзэ тодон понна нырысь сое веръяно. Спектаклез кылдытӥсьёс В. Сафонов режиссёрлэн кивалтэмез улсын зол ужаллям ӟеч урожай бичан понна.

Анастасия Шумилова
Удмурт Дунне Май 17, 2013